ધર્મ – સમાજ

ભાડજ સ્થિત ઇસ્કોન હરેકૃષ્ણ મંદિર, ભગવાન શ્રીકૃષ્ણનો જન્માષ્ટમીનો સંદેશ “સ્વાગતમ્ કૃષ્ણ 2026” સમગ્ર ગુજરાતમાં સમાજના દરેક વર્ગ સુધી પહોંચાડશે

 August 20, 2026

સુરતમાં પ્રથમ વખત ત્રણ દિવસીય ‘કૃષ્ણોત્સવ’: ભક્તિ, પ્રેમ અને ઉજવણીનો અનોખો સંગમ

 August 19, 2026

દત્તાશ્રય આશ્રમમાં ગુરુપૂર્ણિમા મહોત્સવ ભવ્ય ભક્તિભાવ સાથે ઉજવાયો

 July 29, 2026

 કોસંબા: દત્તાશ્રય આશ્રમ ખાતે ગુરુપૂર્ણિમાનો પવિત્ર મહોત્સવ અત્યંત ભક્તિમય અને દિવ્ય વાતાવરણમાં ભવ્ય રીતે ઉજવાયો. સમગ્ર આશ્રમ ગુરુભક્તિ, વૈદિક મંત્રોચ્ચાર અને ભજન-કીર્તનથી ગુંજી ઉઠ્યો હતો. રાજ્યના વિવિધ વિસ્તારોમાંથી મોટી સંખ્યામાં ભાવિક ભક્તોએ ઉપસ્થિત રહી ગુરુચરણોમાં વંદના અર્પણ કરી આશીર્વાદ પ્રાપ્ત કર્યા.

દત્તાશ્રય આશ્રમના સ્થાપક આચાર્ય શ્રી ભાવિનભાઈ પંડ્યા અને આચાર્ય શ્રી મનનભાઈ પંડ્યાએ ઉપસ્થિત ભક્તોને આશીર્વચન આપતાં જણાવ્યું કે ગુરુનું સાન્નિધ્ય જીવનને સાચી દિશા, સંસ્કાર અને આધ્યાત્મિક ઉન્નતિ તરફ દોરી જાય છે. તેમણે દરેક ભક્તને સનાતન ધર્મના મૂલ્યોને જીવનમાં ઉતારવા, વેદોનું નિયમિત અધ્યયન કરવા અને ભારતીય સંસ્કૃતિનું રક્ષણ કરવા પ્રેરણા આપી.

આચાર્યશ્રીઓએ પોતાના સંદેશમાં જણાવ્યું કે સમય જીવનની સૌથી મૂલ્યવાન સંપત્તિ છે. તેથી સમયનો દુરુપયોગ કરવાને બદલે જ્ઞાન, સાધના, સેવા અને સદ્કર્મોમાં તેનો સદુપયોગ કરવો જોઈએ. તેમણે યુવાનોને નકારાત્મક વિચારો, વ્યસનો અને નિરર્થક પ્રવૃત્તિઓથી દૂર રહી સકારાત્મક જીવનશૈલી અપનાવવાની અપીલ કરી.

પર્યાવરણ સંરક્ષણને પણ આધ્યાત્મિક જવાબદારી ગણાવતા આચાર્યશ્રીઓએ દરેક ભક્તને વૃક્ષારોપણ કરવાનો સંકલ્પ કરાવ્યો અને હરિયાળા તથા સ્વચ્છ ભારતના નિર્માણમાં સહભાગી બનવા આહ્વાન કર્યું.

ગુરુપૂર્ણિમાના પાવન અવસરે **ભવ્ય ગુરુપૂજન, પાદુકા પૂજન, વિશેષ મંત્ર દીક્ષા, વૈદિક મંત્રોચ્ચાર, ભજન-કીર્તન, મહાઆરતી તથા મહાપ્રસાદ (ભંડારા)**નું ભવ્ય આયોજન કરવામાં આવ્યું હતું. હજારો ભક્તોએ શ્રદ્ધાભાવથી આ તમામ ધાર્મિક વિધિઓમાં સહભાગી બની ગુરુકૃપાનો લાભ પ્રાપ્ત કર્યો.

સમગ્ર કાર્યક્રમ દરમિયાન ભક્તિમય, શાંતિમય અને આધ્યાત્મિક વાતાવરણ સર્જાયું હતું. ભક્તોએ ગુરુચરણોમાં નમન કરી પોતાના જીવનમાં સદાચાર, સેવા, સંસ્કાર અને સનાતન ધર્મના આદર્શોને અનુસરવાનો સંકલ્પ વ્યક્ત કર્યો.

જય જય દત્તાશ્રય!
જય ગુરુદેવ દત્ત!
નર્મદે હર!

લંડનના હાઉસ ઓફ લોર્ડ્સમાં આચાર્ય ભાવિનભાઈ પંડ્યા અને આચાર્ય મનનભાઈ પંડ્યાને “Global Leader of the Year 2026” એવોર્ડથી સન્માનિત કરાયા.

 July 13, 2026

દત્તાશ્રય આશ્રમ છેલ્લા ૧૧ વર્ષથી સનાતન ધર્મ, વૈદિક સંસ્કૃતિ અને માનવસેવાને સમર્પિત એક પ્રેરણાદાયી આધ્યાત્મિક કેન્દ્ર તરીકે કાર્યરત છે. આશ્રમના સ્થાપક આચાર્ય શ્રી ભાવિનભાઈ પંડ્યા અને આચાર્ય શ્રી મનનભાઈ પંડ્યાના માર્ગદર્શન હેઠળ લાખો ભક્તો આધ્યાત્મિક શાંતિ, ભક્તિ અને ગુરુકૃપાનો અનુભવ કરી રહ્યા છે.

આચાર્ય શ્રી ભાવિનભાઈ પંડ્યા અને આચાર્ય શ્રી મનનભાઈ પંડ્યાએ માત્ર ગુજરાત કે ભારત પૂરતું જ નહીં, પરંતુ સમગ્ર વિશ્વમાં સનાતન ધર્મ અને ભારતીય આધ્યાત્મિક પરંપરાનો ગૌરવ વધાર્યો છે. વર્ષ ૨૦૨૬માં લંડન સ્થિત બ્રિટિશ સંસદના ઐતિહાસિક “House of Lords” ખાતે આયોજિત આંતરરાષ્ટ્રીય સમારોહમાં બંને આચાર્યશ્રીઓને તેમના આધ્યાત્મિક નેતૃત્વ, માનવસેવા અને સનાતન સંસ્કૃતિના વૈશ્વિક પ્રચાર-પ્રસાર માટે પ્રતિષ્ઠિત “Global Spiritual Leader Award 2026” એનાયત કરવામાં આવ્યો હતો. આ સન્માન દત્તાશ્રય આશ્રમ, ગુજરાત અને સમગ્ર ભારત માટે ગૌરવની ઐતિહાસિક ક્ષણ બની છે.

દત્તાશ્રય આશ્રમના સ્થાપક આચાર્ય શ્રી ભાવિનભાઈ પંડ્યા અને આચાર્ય શ્રી મનનભાઈ પંડ્યા, આધ્યાત્મિક ક્ષેત્રમાં અનેક ઐતિહાસિક સિદ્ધિઓ પ્રાપ્ત કરી છે. વર્ષ ૨૦૨૫માં આયોજિત ભવ્ય ૧૦૦૮ હનુમંત યજ્ઞ અને વર્ષ ૨૦૨૬માં સતત ૨૪ કલાકના અખંડ દત્ત બાવની પાઠને India Book of Records તેમજ Asia Book of Recordsમાં સ્થાન મળ્યું છે. આ સિદ્ધિઓ આશ્રમની ભક્તિ, શિસ્ત અને વૈદિક પરંપરાપ્રતિની અડગ નિષ્ઠાનો જીવંત પુરાવો છે.

આશ્રમની સૌથી વિશેષ ઓળખ છે અખંડ અગ્નિ. છેલ્લા ૧૧ વર્ષથી યજ્ઞશાળામાં અખંડ અગ્નિ સતત પ્રજ્વલિત છે, જે સનાતન પરંપરા, યજ્ઞ સંસ્કૃતિ અને આધ્યાત્મિક ઊર્જાનું પ્રતિક છે. અહીં નિયમિત યજ્ઞ, વૈદિક મંત્રોચ્ચાર અને આધ્યાત્મિક અનુષ્ઠાનો દ્વારા ભક્તોને સકારાત્મક ઊર્જા અને આંતરિક શાંતિનો અનુભવ કરાવવામાં આવે છે.

દરરોજ આશ્રમમાં ભગવાન દત્તાત્રેયની નિત્ય પૂજા, ગુરુ પૂજન, પાદુકા પૂજન, વૈદિક આરતી અને ભજન-સંકીર્તન થાય છે. દર *ગુરુવાર અને રવિવારે મહાભંડારો (મહાપ્રસાદ)*નું આયોજન થાય છે, જેમાં હજારો ભક્તો પ્રસાદનો લાભ લે છે. આશ્રમમાં આવનાર દરેક ભક્તને નિઃસ્વાર્થ ભાવથી સેવા અને પ્રસાદ આપવામાં આવે છે.

દત્તાશ્રય આશ્રમની ગૌશાળા પણ સેવા અને સંસ્કારનું મહત્વપૂર્ણ કેન્દ્ર છે. અહીં ગૌમાતાની સેવા, ગૌપૂજન અને ગૌસંવર્ધન દ્વારા ભારતીય સંસ્કૃતિના આ પવિત્ર મૂલ્યોને જીવંત રાખવામાં આવે છે. ગૌસેવાને આશ્રમમાં વિશેષ આધ્યાત્મિક સાધના તરીકે માનવામાં આવે છે.

દત્તાશ્રય આશ્રમ માત્ર એક મંદિર કે ધાર્મિક સ્થળ નથી, પરંતુ ભક્તિ, સેવા, સંસ્કાર, ગૌસેવા, મહાયજ્ઞ, વૈદિક પરંપરા અને સનાતન ધર્મને સમર્પિત જીવંત આધ્યાત્મિક પરિવાર છે. ગુરુદેવ દત્તની કૃપા, અખંડ અગ્નિની દિવ્ય શક્તિ અને આચાર્યશ્રીઓના માર્ગદર્શનથી આ આશ્રમ લાખો લોકોના જીવનમાં પ્રકાશ, શાંતિ અને આધ્યાત્મિક ઉન્નતિનું કેન્દ્ર બની રહ્યો છે.
જય જય દત્તાશ્રય!
જય ગુરુદેવ દત્ત!

સુરતના ભેદવાડ વિસ્તારમાં ‘શિવ-ભીમ મહોત્સવ’ અને નવનિર્વાચિત નગરસેવકોનો સન્માન સમારોહ ભવ્ય રીતે સંપન્ન થયો

 May 6, 2026

સુરતમાં ગુંજ્યો નવકાર મહામંત્રનો મહાજાપ: કેન્દ્રીય મંત્રી અમિત શાહના વર્ચ્યુઅલી જોડાયા

 April 10, 2026 (updated)

10 હજારથી વધુ શ્રદ્ધાળુઓની હાજરીમાં ભવ્ય આયોજન સફળ, 108 દેશોમાં 10 કરોડ લોકો જોડાવાના વૈશ્વિક લક્ષ્ય સાથે કરાયું આયોજન

સુરત : વિશ્વ શાંતિ, અહિંસા અને આધ્યાત્મિક એકતાનો સંદેશ આપતા વિશ્વ નવકાર મહામંત્ર દિવસ નિમિત્તે સુરતમાં ગુરુવારે ભવ્ય સામૂહિક મહાજાપ સફળતાપૂર્વક યોજાયો હતો. જૈન ઇન્ટરનેશનલ ટ્રેડ ઓર્ગેનાઇઝેશન (JITO) સુરત દ્વારા ઇન્ડોર સ્ટેડિયમ ખાતે સવારે 7:29 થી 9:36 દરમિયાન યોજાયેલા આ કાર્યક્રમમાં 10 હજારથી વધુ શ્રદ્ધાળુઓએ હાજરી આપી, જેના કારણે સમગ્ર પરિસર નવકાર મંત્રના ગુંજનથી ભક્તિમય બની ગયું હતું.

આ પ્રસંગે કેન્દ્રીય ગૃહમંત્રી અમિત શાહ વર્ચ્યુઅલ રીતે જોડાયા હતા અને તેમના સંબોધનમાં જણાવ્યું હતું કે નવકાર મંત્ર કોઈ વ્યક્તિનું સ્મરણ નહીં પરંતુ પદ અને ગુણોની આરાધના છે. તેમણે ભારપૂર્વક કહ્યું કે જે વ્યક્તિ ગુણોની પૂજા કરે છે, તે ગુણો આપોઆપ તેના જીવનમાં પ્રવેશ કરે છે. નવકાર મંત્ર માનવ જીવનને શ્રેષ્ઠતા તરફ દોરી જતો માર્ગ છે અને આજના અશાંતિભર્યા વિશ્વમાં “સવ્વ પાવપ્પણાસણો” અને “મંગલાણં ચ સવ્વેસિં” જેવા સંદેશો સમગ્ર માનવજાત માટે કલ્યાણકારી છે. તેમણે નવી દિલ્હીના વિજ્ઞાન ભવનમાં યોજાયેલા કાર્યક્રમનો ઉલ્લેખ કરતાં આ પવિત્ર મંત્રની શક્તિ જન-જન સુધી પહોંચાડવાનો સંકલ્પ વ્યક્ત કર્યો હતો.

સુરતના ઇન્ડોર સ્ટેડિયમમાં યોજાયેલા આ મહાજાપમાં શહેરના અનેક આગેવાનો અને ગણમાન્ય મહાનુભાવો હાજર રહ્યા હતા. સમગ્ર કાર્યક્રમ દરમિયાન ભક્તોએ એકસ્વરે મહાજાપ કરી વિશ્વ શાંતિ, સૌહાર્દ અને અહિંસાની ભાવનાને પ્રગટ કરી હતી.

આ કાર્યક્રમમાં ગચ્છાધિપતિ, આચાર્ય ભગવંતો, સાધ્વીજી ભગવંતો સહિત ચતુર્વિધ સંઘની પવિત્ર નિશ્રામાં કાર્યક્રમ ભક્તિભાવ સાથે પૂર્ણ થયો હતો. સુરતના તમામ જૈન સંઘો, સમાજના આગેવાનો, JITOના પદાધિકારીઓ અને સભ્યો સાથે સમગ્ર જૈન સમાજની ઉપસ્થિતિએ આ અવસરને યાદગાર બનાવી દીધો હતો.

કાર્યક્રમ દરમિયાન મનન સંઘવી, ધ્વનિલ કેસુડિયા તથા બાળ કલાકાર વિવાન બાફનાની રજૂઆતોએ સૌને મંત્રમુગ્ધ કરી દીધા હતા. સાથે જ શાસન ભક્તિના વિશેષ આયોજનથી સમગ્ર વાતાવરણ વધુ પ્રેરણાદાયક બન્યું હતું.

JITO સુરતના જણાવ્યા મુજબ આ વર્ષે વિશ્વ નવકાર મહામંત્ર દિવસ 108થી વધુ દેશોમાં ઉજવાયો, જેમાં આશરે 10 કરોડ લોકો જોડાવાનું લક્ષ્ય રાખવામાં આવ્યું હતું

આ સમગ્ર આયોજન મિલન પારીખ (ચેરમેન), મિતેશ ગાંધી (ચીફ સેક્રેટરી), લલિત શાહ, નિરવ શાહ અને પ્રકાશ ડુંગાણીની આગેવાની હેઠળ સફળતાપૂર્વક પાર પડ્યું હતું. આયોજકોએ તમામ સહભાગીઓને આભાર વ્યક્ત કરતાં જણાવ્યું હતું કે સૌના સહકાર અને ઉત્સાહથી આ કાર્યક્રમને નવી ઊંચાઈ મળી છે.

આ મહાજાપ દ્વારા “એક ભાવના, એક ઉદ્દેશ્ય, એક વિશ્વ, એક સ્પંદન, એક મંત્ર”નો સંદેશ જનજન સુધી પહોંચ્યો હોવાનું આયોજકોએ જણાવ્યું હતું.

સુરતમાં યોગદા સત્સંગ સોસાયટીનો ક્રિયાયોગ કાર્યક્રમ સંપન્ન, પાંચ આધ્યાત્મિક પુસ્તકોનું વિમોચન

 November 28, 2025 (updated)

સ્વામી શુદ્ધાનંદગીરીએ આપ્યું જીવનમૂલ્યોને સ્પર્શતું પ્રેરણાદાયી પ્રવચન

સુરતઃ પરમહંસ યોગાનંદજીએ સ્થાપેલી યોગદા સત્સંગ સોસાયટી ઓફ ઇન્ડિયાના સુરત દ્વારા આજરોજ ઇચ્છાનાથ–ડુમસ રોડ સ્થિત સરદાર વલ્લભભાઈ પટેલ ગેસ્ટ હાઉસ ખાતે ક્રિયાયોગ પર વિશેષ કાર્યક્રમ યોજાયો હતો. “આનંદમય અને સફળ જીવનની કુંજી – ક્રિયાયોગ વિજ્ઞાન” વિષયક આ ધાર્મિક કાર્યક્રમમાં શહેરના અનેક જિજ્ઞાસુઓ ઉપસ્થિત રહ્યા હતા.

સાંજે 6થી 6:30 વાગ્યા દરમિયાન ભજનોથી કાર્યક્રમની શરૂઆત થઈ. ત્યારબાદ 6:30થી 7 વાગ્યા દરમિયાન આધ્યાત્મિક સાહિત્ય પર આધારિત પાંચ પુસ્તકોનું વિમોચન કરાયું, જેને હાજર શ્રોતાઓએ તાળીપાડી આવકાર્યું.

મુખ્ય વક્તા સ્વામી શુદ્ધાનંદગીરીએ તેમના પ્રેરક સંદેશમાં જણાવ્યું કે પરમહંસ યોગાનંદજીએ શીખવેલ ક્રિયાયોગ વિજ્ઞાન મન, પ્રાણ અને ચેતનાને શુદ્ધ કરીને જીવનમાં શાંતિ અને સફળતાના દ્વાર ખોલે છે. તેમણે ગીતામાં ભગવાન કૃષ્ણ દ્વારા અર્જુનને “તુ યોગી બન” કહેવાયેલી પ્રેરણાની વ્યાખ્યા કરતા યોગના વિવિધ માર્ગોમાં રાજયોગની વિશિષ્ટતા સમજાવી.

સ્વામીએ વધુમાં કહ્યું કે ક્રિયાયોગ એ પ્રાણાયમની સર્વોચ્ચ રીત છે, જેનાથી મેરુદેહમાં સ્થિત ચક્રો જાગૃત થઈને ભક્ત આત્મસાક્ષાત્કારના માર્ગે આગળ વધે છે. આ માર્ગ જીવનના “કુરુક્ષેત્ર” જેવા આંતરિક સંઘર્ષોને જીતવામાં મદદરૂપ બને છે.

યોગદા સત્સંગ ઘ્યાન કેન્દ્ર, સુરત દ્વારા આયોજિત આ કાર્યક્રમમાં મોટી સંખ્યામાં શ્રદ્ધાળુઓએ ભાગ લઇ આધ્યાત્મિક લાભ મેળવ્યો હતો. સમગ્ર કાર્યક્રમ સુખદ, શાંત અને આધ્યાત્મિક ઊર્જાથી ઓતપ્રોત માહોલમાં સફળતાપૂર્વક પૂર્ણ થયો

અધ્યાત્મ અને ભક્તિનો મહાપર્વ: તેરાપંથ ધર્મસંસ્કૃતિનું દીપસ્તંભ બનેલા વાવમાં ખાતે પધારી રહ્યા છે આચાર્ય મહાશ્રમણ

 April 12, 2025 (updated)

સુરત. તેરાપંથ ધર્મસંસ્કૃતિનું દીપસ્તંભ બનેલા વાવ પથક ખાતે તેજસ્વી માર્ગદર્શક, યુગપ્રધાન, પૂજ્ય આચાર્યશ્રી મહાશ્રમણજી પ્રવાસે પધારી રહ્યા છે.યુગપ્રધાન આચાર્યશ્રી મહાશ્રમણ તૃતીય વાર વાવ પધારી રહ્યા છે.

આચાર્યશ્રી મહાશ્રમણજી—એક એવું દિવ્ય વ્યક્તિત્વ, જે માત્ર શાબ્દિક વ્યાખ્યામાં બંધાઈ ન શકે. વિચારો ની ક્રાંતિ, કર્મની પરિભાષા અને કલ્યાણની સરિતા એવા મહાન યોગીપુરુષ!

તેમના અધ્યાત્મયજ્ઞે અંધશ્રદ્ધા, સામાજિક દૂષણો અને રૂઢિચુસ્ત માન્યતાઓ પર સશક્ત ઘાત કર્યા છે. આચાર્યશ્રી માત્ર વિચાર નહિં, નશામુક્તિ અને આધ્યાત્મિક જાગૃતિના જીવનમંત્રથી ૧ કરોડથી વધુ લોકોમાં પરિવર્તન લાવનાર પ્રભાવશાળી પ્રણેતા છે!

આચાર્ય મહાશ્રમણ જીએ  60,000 કિમીથી વધુની પદયાત્રા, ૨૩ રાજ્યો અને હિમાલય પાર્શ્વના પ્રદેશો સુધી ધર્મસંચાર કર્યો છે.

એક સાથે ૪૩ સંયમરત્નો નું દિક્ષાસંસ્કાર, જે સંતપરંપરાનો એક અદભૂત અધ્યાય બન્યો હતો. આજ સુધી તેરાપંથ ધર્મસંઘ માં વાવ પથક માંથી  31 સંયમ રત્નો દીક્ષિત થયા છે. જે વાવ પથક માટે સાત્વિક ગૌરવ ની વાત છે. આપણા આરાધ્યના આગમનથી વાવની ધરા પર એક મહોત્સવ રૂપી આભા છવાઈ રહી છે. આ એક સાધારણ ઘટના નહીં પણ ધર્મ અને ભક્તિનું મહાપર્વ છે, જ્યાં શ્રદ્ધા, અનુશાસન અને અધ્યાત્મનો સંગમ થશે!

જૈન તેરાપંથ ધર્મસંઘ ના એકાદશમ અધિશાસ્તા યુગપ્રધાન આચાર્ય શ્રી મહાશ્રમણ જી 12 વર્ષ પછી વાવની ધરાને પાવન કરવા આવી રહ્યા છે અને આ અવસરે વાવ નગરના દરેક બાળક,યુવાન અને વડીલ શ્રાવકો તેમજ જૈન અને જૈનેતર દરેક ના મન માં એમના આરાધ્ય ના આગમન નો અનેરો ઉમઁગ છવાયેલો જોવા મળી રહ્યો છે. તેરાપંથ ધર્મસંઘના આચાર્ય નો પ્રવાસ બહુમૂલ્ય હોય છે જેમના ભાગ્યના દ્વાર ખુલે તેમને જ એમનું સાનિધ્ય પ્રાપ્ત થાય અને આજે આ અવસરે વાવમાં નવા નવા કિર્તીમાન થવા જઈ રહ્યા છે. મહાશ્રમણ  મુખ્ય પ્રવેશદ્વાર , વાવ નૂતન તેરાપંથ ભવન નિર્માણ , વાવ તેરાપંથ ભવન નવીનીકરણ તેમજ ભવ્ય પ્રવચન પંડાળથી વાવ અને વાવ નગરના દરેક શ્રાવક એમના આરાધ્યના સ્વાગત માટે સજી ધજી ને તૈયાર થઈ ગયા છે.14 એપ્રિલ 2025ના રોજ ભવ્ય મહાશ્રમણ મુખ્ય પ્રવેશદ્વાર અને ભવ્ય નૂતન તેરાપંથ ભવનનું લોકાર્પણ આચાર્ય શ્રીના વરદ હસ્તે થશે. 14 થી 22 એપ્રિલના 9 દિવસ ના પાવન પ્રસંગે આચાર્ય શ્રીની અમૃતવાણી , ચરણ સ્પર્શ , સાધુ – સાધ્વી જી નું સાનિધ્ય થી વાવના દરેક શ્રાવકો ધન્યતા નો અનુભવ કરશે અને વાવ ના મુમુક્ષુ રત્ન કલ્પભાઈ ની શોભાયાત્રા તેમજ દીકરી વાવ તેરાપંથ ની અને જૈન કાર્યશાળા થકી વાવ નગર શોભાયમાન થશે.

જૈન પ્રબુદ્ધ આચાર્ય મહાશ્રમણ ના આગમન માટે નાનકડા ગામમાં આશરે 5000 વ્યક્તિનો ભવ્ય પંડાળ બની રહ્યો છે. ત્યાં અંદાજિત 10000 થી વધારે લોકો આચાર્ય શ્રીના પાવન સાનિધ્યનો લાભ લેશે. આ પ્રસંગે વાવ નગર વાસી પણ ખૂબ જ સહયોગ આપી રહ્યા છે . આચાર્ય શ્રીના આ 9 દિવસ નો પાવન પ્રવાસ વાવ ના શ્રાવક સમાજ માટે ઉત્સવ બની ગયો છે.

ઐતિહાસિક શિવ મહાપુરાણ કથાના ઉપલક્ષમાં ભવ્ય કળશ યાત્રા યોજાઈ

 January 13, 2025 (updated)

ડીંડોલી મિલેનિયમ પાર્ક સ્થિત પંચદેવાલય મહાદેવ મંદિરથી નીકળી કથા સ્થળ વેદાંત સીટી ખરવાસા. સુધી યોજાયેલી ભવ્ય કળશ યાત્રામાં એક લાખ થી વધુ ભકતો જોડાયા

લેઝીમ ગ્રુપ, ભજન મંડળીઓ સહિત ડીજે અને બેન્ડ ગૃપોએ જમાવ્યું આકર્ષણ

સુરત. સુરતની ધરતી પર ખરવાસા ખાતેની વેદાંત સીટી ખાતે 16 થી 22 જાન્યુઆરી સુધી યોજાઈ રહેલી ભારતની સૌથી મોટી અને ઐતિહાસિક શિવ મહાપુરાણ કથાના ઉપલક્ષમાં આજરોજ ભવ્ય કળશ યાત્રાનું આયોજન કરવામાં આવ્યું હતું. કથા આયોજક સુનિલ ભાઇ પાટીલ અને સમ્રાટ ભાઇ પાટીલ.. અને શ્રી સાંઈ લીલા ગ્રુપ દ્વારા આયોજિત ભવ્ય કળશ યાત્રામાં લાખોની સંખ્યામાં ભક્તો જોડાયા હતા અને સમગ્ર માહોલ શિવમય જોવા મળ્યો હતો. આ દરમિયાન લેઝિમ ગ્રુપ, ભજન મંડળીઓ અને ડી જે તેમજ બેન્ડ ગ્રૂપોએ ભારે આકર્ષણ જમાવ્યું હતું.

આ અંગે આયોજક શ્રી સુનીલ ભાઇ પાટીલ અને સમ્રાટ ભાઇ પાટિલે જણાવ્યું હતું કે સુરત ખાતે ડિંડોલી પલસાણા રોડ પર ખરવાસા ખાતે આવેલ વેદાંત સીટી ખાતે આંતરરાષ્ટ્રીય સુપ્રસિદ્ધ કથા વાચક શ્રી પંડિત પ્રદીપ મિશ્રાજી( સિંહોર વાળા ) ના સાનિધ્યમાં ભૂતો ન ભવિષ્યતિ એવું ઐતિહાસિક શિવ મહાપુરાણ કથાનું આયોજન કરવામાં આવ્યું છે. 16 થી 22 જાન્યુઆરી સુધી યોજાનાર આ શિવ મહાપુરાણ કથામાં આશરે 20 લાખથી વધુ ભક્તો ઉમટી પડશે. ત્યારે આ ભવ્ય આયોજનના અવસરે શ્રી સાંઈ લીલા ગ્રુપ દ્વારા આજરોજ ભવ્ય કળશ યાત્રાનું આયોજન કરવામાં આવ્યું હતું. સવારે દસ વાગે ડિંડોલી મિલેનિયમ પાર્ક સ્થિત પંચદેવાલય મહાદેવ મંદિર ખાતેથી કળશ યાત્રાની શરૂઆત થઈ હતી અને ત્યારબાદ ખરવાસા વેદાંત સીટી ખાતે કથા સ્થળ પર કળશ યાત્રાનું સમાપન થયું હતું. આ ભવ્ય કળશ યાત્રામાં લાખો ભક્તો સ્વયંભૂ જોડાયા હતા. એટલું જ નહી પણ શહેરના વિવિધ લેઝિમ ગ્રુપ, ભજન મંડળીઓ , ડી જે અને બેન્ડ ગ્રુપો જોડાયા હતા જેમને ભારે આકર્ષણ જમાવ્યું હતું. કથા સ્થળ ખાતે કળશ યાત્રાના સમાપન બાદ તમામ ભક્તોએ મહાપ્રસાદીનો લાભ લીધો હતો. ઉલ્લેખનીય છે શ્રી સાંઈ લીલા ગ્રુપ દ્વારા 16 થી 22 જાન્યુઆરી સુધી ખરવાસા વેદાંત સીટી ખાતે આંતરરાષ્ટ્રીય કથા વાચક શ્રી પંડિત પ્રદીપ મિશ્રાજી મહારાજના સાનિધ્યમાં ઐતિહાસિક શિવ મહાપુરાણ કથાનું આયોજન કરવામાં આવ્યું છે. જે માટેની તડામાર તૈયારીઓ ચાલી રહી છે.

• 55 ફૂટની વિશાળ ત્રિશુલ અને 12 જ્યોતિર્લિંગના દર્શનનો ભક્તોને મળશે લાભ

શ્રી સુનીલ ભાઇ પાટીલ અને સમ્રાટ ભાઇ પાટીલે જણાવ્યું હતું કે શ્રી સાંઈ લીલા ગ્રુપ દ્વારા આયોજીત ઐતિહાસિક શિવ મહાપુરાણ કથામાં જ્યારે રોજ લાખો લોકો કથા શ્રાવણ માટે પધારવાના છે ત્યારે ભક્તોને એક જ સ્થળે 12 જ્યોતિર્લિંગના દર્શન થાય એવું આયોજન પણ કથા સ્થળે કરવામાં આવ્યું છે. કથા સ્થળ ખાતે આજરોજ 55 ફૂટ ની વિશાળ ત્રિશુલનું અનાવરણ કરવામાં આવ્યું હતું જ્યારે અહીં 12 જ્યોતિર્લિંગ નું પણ નિર્માણ કરવામાં આવી રહ્યું

સુરતમાં 16મી જાન્યુઆરીથી આંતરાષ્ટ્રીય કથા વાચક પંડિત પ્રદીપ મિશ્રાના સાનિધ્યમાં ઐતિહાસીક શિવ મહાપુરાણ કથાનું આયોજન

 January 2, 2025 (updated)

ડિંડોલી – પલસાણા રોડ પર ખરવાસા વેદાંત સીટી ખાતે આયોજિત ભવ્ય શિવ મહાપુરાણ કથામાં રોજ 10 લાખ થી વધુ ભકતો લેશે કથા શ્રવણનો લાભ

5 મી જાન્યુઆરીએ કથાસ્થળ પર રુદ્રાભિષેક અને 12 મી જાન્યુઆરીએ કળશ યાત્રાનું આયોજન

160 વીઘામાં પાર્કિગની વ્યવસ્થા સાથે કથા સ્થળ પર જર્મન પંડાલ નું નિર્માણ

સુરત. સુરત શહેરના આંગણે અનેરા પ્રસંગનું આયોજન થવા જઈ રહ્યું છે. શ્રી સાંઈ લીલા ગ્રુપ દ્વારા ડિંડોલીના ખરવાસા ખાતે આગામી 16 જાન્યુઆરીથી આંતરરાષ્ટ્રીય કથા વ્યાસ શ્રી પંડિત પ્રદીપ મિશ્રા જી (સિહોર વાલે) ના સાનિધ્યમાં શ્રી શિવ મહાપુરાણ કથાનું આયોજન કરવામાં આવ્યું છે. જે માટેની તડામાર તૈયારીઓ શરૂ થઈ ગઈ છે અને હજારોની સંખ્યામાં ભાવિક ભકતો સ્વયંભૂ સેવા માટે આવી રહ્યા છે, જેને પગલે હમણાંથી જ સુરતનું વાતાવરણ શિવમય જોવા મળ્યું રહ્યું છે. આ આયોજનમાં પ્રતિદિન લાખોની સંખ્યામાં ભાવિક ભકતો કથા શ્રવણ માટે ઉમટી પડશે તેને ધ્યાનમાં રાખી આયોજક સમ્રાટ પાટીલ અને સુનીલ પાટીલ દ્વારા આયોજન હાથ ધરવામાં આવ્યું છે. ડિંડોલી – પલસાણા રોડ પર ખરવાસા ખાતે આવેલ વેદાંત સીટી ખાતે કથાનું આયોજન થવા જઈ રહ્યું છે જ્યાં 200 વીઘા જેટલી વિશાળ જગ્યામાં તમામ સુવિધાઓ થી સજ્જ જર્મન પંડાલ હશે.સાથે જ ભકતો માટે 160 વીઘામાં વિશાળ પાર્કિગની વ્યવસ્થા કરવામાં આવી છે.

સુરતના ખરવાસા ખાતે આંતરરાષ્ટ્રીય કથા વ્યાસ શ્રી પંડિત પ્રદીપ મિશ્રાજીના પાવન સાનિધ્યમાં યોજાનારા ભવ્ય શ્રી શિવ મહાપુરાણ કથાના આયોજક સુનિલ પાટીલ અને સમ્રાટ પાટિલે જણાવ્યું હતું કે આ તેઓનું અને ખાસ કરીને સુરત અને ગુજરાતના શિવ ભક્તોનું સૌભાગ્ય છે કે તેઓ શ્રી શિવ મહાપુરાણ કથાનું શ્રવણ કરવાના છે. ડિંડોલી – પલસાણા રોડ પર ખરવાસા ખાતે સ્થિત વેદાંત સીટી ખાતે તારીખ 16 જાન્યુઆરી થી 22 જાન્યુઆરી સુધી શ્રી શિવ મહાપુરાણ કથાનું આયોજન કરવામાં આવ્યું છે, ભૂતો ન ભવિષ્યતિ આ આયોજનમાં એક સાથે 15 લાખ લોકો બેસીને શ્રી શિવ મહાપુરાણ કથાનું શ્રવણ કરી શકે એવું 200 વીઘા જગ્યામાં વિશાળ જર્મન પંડાલ નિર્માણ કરવામાં આવી રહ્યું છે. હજારો ભક્તો સ્થળ પર જ રોકાણ કરતા હોય ત્યારે તેમને કોઈ પણ પ્રકારની અગવડતા નહીં પડે તે રીતે તમામ પ્રકારની સુવિધાઓ ઉપલબ્ધ કરવામાં આવી રહી છે. લાખો લોકોની ઉપસ્થિતિને ધ્યાન માં રાખી વિશાળ રસોડું સાતો દિવસ 24 કલાક ચાલુ રહશે એટલે કે ભકતો ગમે ત્યારે મહાપ્રસાદીનું આચમન કરી શકશે. આ માટે અત્યારથી જ કથા સ્થળ ખાતે આયોજનની શરૂઆત કરી દેવામાં આવી છે. વિવિધ પ્રકારની સેવાઓ ભકતો માટે ઉપલબ્ધ થઈ શકે તે માટે ભકતો સ્વયંભૂ સેવામાં જોડાઈ રહ્યા છે. રોજ મોટી સંખ્યામાં ભક્તો સેવા માટે ઉમટી રહ્યા છે. એટલું જ નહીં પણ 16 થી 22 જાન્યુઆરી દરમિયાન સેવા આપવા માટે અત્યાર સુધી 20 હજારથી વધુ ભક્તો પોતાના નામની નોંધણી કરાવી ચૂક્યા છે અને હજી પણ રોજ મોટી સંખ્યામાં લોકો નામ નોંધાવા આવી રહ્યા છે.  

– પહેલા દિવસથી રસોડું કાર્યરત :-
શ્રી શિવ મહાપુરાણ કથાના આયોજનની તૈયારીના પહેલા દિવસથી જ અહીં ભકતો માટે રસોડું કાર્યરત કરવામાં આવ્યું છે. રોજ મોટી સંખ્યામાં ભક્તો સેવા માટે સ્વયંભૂ આવી રહ્યા છે ત્યારે સેવાદારો માટે સવાર સાંજ ભોજનની વ્યવસ્થા કરવામાં આવી છે. એટલું જ નહી પણ કથા આયોજનમાં દિવસો દરમિયાન સ્થળ પર 24 કલાક મહાપ્રસાદીનું આયોજન પણ કરવામાં આવ્યું છે.

– આયોજનની બંને દિશાએ બે કિમીના અંતરે પાર્કિગની વ્યવસ્થા

શ્રી શિવ મહાપુરાણ કથામાં રોજ દસથી પંદર લાખ ભક્તો ઉમટી પડશે ત્યારે આયોજકો દ્વારા કથા સ્થળથી બંને દિશામાં બે કિમીના અંતરે વિશાળ પાર્કિગની વ્યવસ્થા ઉભી કરવામાં આવી છે. ભકતો પોતાના વાહન સુ વ્યવસ્થિત રીતે વાહન પાર્ક કરી શકે તે માટે 160 વીઘામાં પાર્કિંગ ઝોન બનવામાં આવ્યું છે. પાર્કિંગ સ્થળ પર વ્યવસ્થા સાંભળવા માટે પણ મોટી સંખ્યામાં સ્વયમ્ સેવકો ઉપસ્થિત રહશે.

– ધાર્મિક આયોજન સાથે માનવ સેવા

ભવ્ય અને દિવ્ય એવા શિવ મહાપુરાણ કથાના આયોજન સાથે જ સાંઈ લીલા ગ્રુપ દ્વારા 29મી ડિસેમ્બરથી માનવ સેવાનું કાર્ય પણ કથા સ્થળે થઈ રહ્યું છે. અહીં રક્તદાન શિબિરના આયોજન માં મોટી સંખ્યામાં ભક્તો ઉમટી રહ્યા છે.

5મી જાન્યુઆરીએ રુદ્રાભિષેક અને 12મી જાન્યુઆરીએ કળશ યાત્રાનું આયોજન

સાંઈ લીલા ગ્રુપ દ્વારા શિવ મહાપુરાણ કથાના આયોજન પહેલા 5મી જાન્યુઆરીના રોજ કથા સ્થળ પર રુદ્રાભિષેકનું આયોજન કરવામાં આવ્યું છે. ત્યારબાદ 12મી જાન્યુઆરીના રોજ ભવ્ય કળશ યાત્રાનું આયોજન કરવામાં આવ્યું છે. સવારે દસ વાગે મિલેનિયમ પાર્ક સ્થિત પંચદેવાલય મંદિર ખાતેથી કળશ યાત્રાની શરૂઆત થશે અને ખરવાસા વેદાંત સીટી સ્થિત કથા સ્થળ પર પૂર્ણાહુતિ થશે.