– પીએમ મોદીના નાના ભાઈ પ્રહલાદભાઈ મોદીના હસ્તે ઉદ્ઘાટન, ન્યુટ્રિશન અને વેલનેસ અંગે લોકોમાં જાગૃતિ ફેલાવવાનો સંસ્થાપકનો સંકલ્પ
સુરત: ન્યુટ્રિશન અને વેલનેસ અંગે લોકોમાં જાગૃતિ લાવવાના ઉદ્દેશ સાથે ઉમરા ગામ સ્થિત ગોવિંદ પાર્ક જી સોસાયટીમાં ૩૬૯ હીલવેલ ન્યુટ્રિશન સેન્ટરનો પ્રારંભ કરવામાં આવ્યો છે. સેન્ટરની સંસ્થાપક દમયંતી વિકાસ મોદી છે. તેઓ વડાપ્રધાન નરેન્દ્ર મોદીના નાના ભાઈ પ્રહલાદભાઈ મોદીની પુત્રી છે. સેન્ટરનું ઉદ્ઘાટન ૨૧ સપ્ટેમ્બરના રોજ સવારે ૯.૫૦ કલાકે પ્રહલાદભાઈ મોદીના હસ્તે કરવામાં આવ્યું હતું.
સેન્ટરની શરૂઆત વડાપ્રધાન નરેન્દ્ર મોદીના જન્મમાસ દરમિયાન તેમને સન્માન અર્પણ કરવા સાથે ન્યુટ્રિશન અને વેલનેસ અંગે સમાજમાં જાગૃતિ ફેલાવવાના ઉદ્દેશથી કરવામાં આવી હોવાનું દમયંતી મોદીએ જણાવ્યું હતું. તેમના જણાવ્યા અનુસાર, આજના સમયમાં જીવનશૈલી સાથે સંકળાયેલી વિવિધ આરોગ્ય સમસ્યાઓ અંગે લોકોમાં યોગ્ય પોષણ અને સ્વસ્થ જીવનશૈલી અંગેની સમજ વિકસાવવાની જરૂરિયાત છે.
દમયંતી મોદીએ જણાવ્યું હતું કે ડાયાબિટીસ, થાઇરોઇડ સહિતની જીવનશૈલી સાથે સંકળાયેલી સમસ્યાઓ અનેક પરિવારોમાં જોવા મળે છે. આવા સંજોગોમાં લોકોમાં સારા ન્યુટ્રિશન, યોગ્ય આહાર અને જીવનશૈલીમાં જરૂરી ફેરફારો અંગે જાગૃતિ લાવવી જરૂરી છે. આ વિચાર સાથે લોકોને સારા આરોગ્ય માટે માર્ગદર્શન મળે અને તેઓ સ્વસ્થ જીવનશૈલી અપનાવી શકે તે દિશામાં ૩૬૯ હીલવેલ દ્વારા પ્રયાસ કરવામાં આવશે.
– હેલ્થ, વેલ્થ સાથે હીલિંગનો અભિગમ
૩૬૯ હીલવેલ નામ પાછળના વિચાર અંગે દમયંતી મોદીએ જણાવ્યું હતું કે માનવીના જીવનમાં હેલ્થ અને વેલ્થ બંને મહત્વપૂર્ણ છે અને ‘હીલવેલ’ નામમાં આ વિચારને જોડવામાં આવ્યો છે. સારા ન્યુટ્રિશન સાથે હીલિંગ મોડાલિટીને જોડીને લોકો સુધી આરોગ્ય અને વેલનેસનો અભિગમ પહોંચાડવાનો પ્રયાસ છે. તેમણે વધુમાં જણાવ્યું હતું કે ‘૩૬૯’ શરીર, મન અને આત્માના સ્તરે હીલિંગના વિચારનું પ્રતિનિધિત્વ કરે છે. પોતાના હીલિંગ મોડાલિટી સાથેના અનુભવને આધુનિક વિજ્ઞાન અને ન્યુટ્રિશન સાથે જોડીને ૩૬૯ હીલવેલની શરૂઆત કરવામાં આવી છે. સેન્ટરનો મુખ્ય ઉદ્દેશ લોકોને ન્યુટ્રિશન અને વેલનેસ અંગે જાગૃત કરવાનો તથા સ્વસ્થ જીવનશૈલી અંગે માર્ગદર્શન આપવાનો છે.