આ મામલે રેલવે તંત્ર ગંભીર જણાતું નથી
શહેરના નવાગામ ડિંડોલી વિસ્તારમાં રેલ્વે ટ્રેક પરથી એક તરુણનો કપાઈ ગયેલો મૃતદેહ મળી આવતા ચકચાર મચી જવા પામી હતી. બનાવ અંગે રેલ્વે પોલીસ દ્વારા હાલ અકસ્માત મોતનો ગુનો નોંધી વધુ તપાસ હાથ ધરી છે. રેલ્વે પોલીસના જણાવ્યા મુજબ મરણજનાર ડિંડોલી ખાતે આવેલા યોગેશ્વર નગર ખાતે રહેતો હોવાનું અને તેની ઉંમર 17 વર્ષની હોવાનું જાણવા મળ્યું છે. ડિંડોલી ફાટક પાસે આ ઘટના બની છે ત્યારે ટ્રેન ઓળંગવા જતા આ ઘટના સર્જાઈ હોવાનું પ્રાથમિક તબક્કે જાણવા મળી રહ્યું છે. સ્થાનિક લોકોના જણાવ્યા મુજબ ડિંડોલી ફાટક પાસે ટ્રેન નીચે અકસ્માતે કપાઈ જવાની ઘટનાઓ છાશવારે સામે આવતી હોવા છતાં આ મામલે રેલ્વે તંત્ર ગંભીર જણાતું નથી પરિણામે વધુ એક ઘટના સામે આવી છે ત્યારે લોકોમાં આ મામલે આક્રોશ પણ જોવા મળી રહ્યો છે.