સાર્વજનિક યુનિવર્સિટી અને સાર્વજનિક એજ્યુકેશન સોસાયટી (SES) દ્વારા સાર્વજનિક કોલેજ ઑફ લિબરલ આર્ટ્સ (SCLA) નો ભવ્ય પ્રારંભ કરવામાં આવ્યો. ગુણવત્તાસભર અંગ્રેજી માધ્યમમાં લિબરલ આર્ટ્સનું શિક્ષણ પ્રદાન કરવાની દિશામાં આ એક મહત્વપૂર્ણ સીમાચિહ્ન છે. આ નવી સંસ્થા દ્વારા સાર્વજનિક એજ્યુકેશન સોસાયટીની શૈક્ષણિક શ્રેષ્ઠતા અને સર્વાંગી વિકાસની દીર્ઘ પરંપરાને આગળ વધારવાનો સંકલ્પ વ્યક્ત કરવામાં આવ્યો છે.
ઉદ્ઘાટન સમારોહ તા. 10 જુલાઈ, 2026 ના રોજ સાર્વજનિક યુનિવર્સિટીના સેમિનાર હોલ ખાતે યોજાયો હતો. આ પ્રસંગે શ્રી આશિષ વકીલ, પ્રમુખ, સાર્વજનિક યુનિવર્સિટી તથા ચેરમેન, સાર્વજનિક એજ્યુકેશન સોસાયટી; ડૉ. કિરણ પંડ્યા, પ્રોવોસ્ટ, સાર્વજનિક યુનિવર્સિટી; શ્રી અજીત શાહ, વાઇસ ચેરમેન-II, સાર્વજનિક એજ્યુકેશન સોસાયટી; સરવજનિક યુનિવર્સિટીના કાર્યકારી કુલસચિવ શ્રી આશિષ દેસાઈ તેમજ ડૉ. જયેશ દેસાઈ, પ્રિન્સિપાલ, સાર્વજનિક કોલેજ ઑફ લિબરલ આર્ટ્સ ઉપસ્થિત રહ્યા હતા. શ્રી કિશોર દેસાઈ, વાઇસ ચેરમેન-I, પૂર્વનિર્ધારિત વ્યસ્તતાને કારણે હાજર રહી શક્યા નહોતા, પરંતુ તેમણે કોલેજના ઉજ્જવળ ભવિષ્ય માટે શુભેચ્છાઓ પાઠવી હતી.
ઉદ્ઘાટન બાદ નવા વિદ્યાર્થીઓ માટે ચાર દિવસીય ઓરિયન્ટેશન કાર્યક્રમનું આયોજન કરવામાં આવ્યું, જેના માધ્યમથી વિદ્યાર્થીઓને યુનિવર્સિટી, લિબરલ આર્ટ્સ શિક્ષણ અને શૈક્ષણિક માળખા અંગે માહિતગાર કરવામાં આવ્યા.
પ્રથમ દિવસે વિદ્યાર્થીઓ અને તેમના વાલીઓને યુનિવર્સિટી તથા લિબરલ આર્ટ્સના મહત્વ, તેના વ્યાપ અને ભવિષ્યની કારકિર્દીની તકો વિશે માર્ગદર્શન આપવામાં આવ્યું. બીજા દિવસે મેજર અને માઇનર વિષયો, અભ્યાસક્રમ, નિયમો, શૈક્ષણિક પ્રક્રિયા તથા સહ-પાઠ્ય પ્રવૃત્તિઓ અંગે વિસ્તૃત માહિતી આપવામાં આવી.
ત્રીજા દિવસે Fun Introductions, Guess My Birthdate અને Treasure Hunt જેવી રસપ્રદ પ્રવૃત્તિઓ દ્વારા વિદ્યાર્થીઓ વચ્ચે પરિચય, ટીમવર્ક અને ઉત્સાહનું વાતાવરણ સર્જાયું. આ પ્રવૃત્તિઓમાં અર્થશાસ્ત્ર અને મનોવિજ્ઞાનના મૂળભૂત સિદ્ધાંતોને પણ સર્જનાત્મક રીતે સમાવવામાં આવ્યા.
ચોથા અને અંતિમ દિવસે વિષયવાર માર્ગદર્શન સત્રો યોજાયા, જેમાં વિદ્યાર્થીઓને તેમના પસંદ કરેલા વિષયો, અભ્યાસની દિશા અને શૈક્ષણિક અપેક્ષાઓ અંગે વિગતવાર માહિતી આપવામાં આવી.
સાર્વજનિક કોલેજ ઑફ લિબરલ આર્ટ્સની પ્રથમ બેચ માટે આ ઉદ્ઘાટન અને ઓરિયન્ટેશન કાર્યક્રમ એક પ્રેરણાદાયી શરૂઆત સાબિત થયો, જેમાં જિજ્ઞાસા, સર્જનાત્મકતા, સહયોગ અને સર્વાંગી વિકાસના મૂલ્યોને મજબૂત આધાર આપવામાં આવ્યો.