TAADA દ્વારા iNDEXTb (ગુજરાત સરકાર)ના સહયોગથી આયોજન; સાંજે IDTના ભવ્ય ફેશન શો ‘FASHIONOVA 2026’એ સૌનું દિલ જીત્યું
સુરત, તા. 19 જુલાઈ, 2026 : ભારતને વર્ષ 2030 સુધીમાં 100 બિલિયન અમેરિકન ડોલરના ટેક્સટાઇલ અને એપેરલ નિકાસના લક્ષ્ય સુધી પહોંચાડવાના સંકલ્પને આગળ વધારતા સુરતે આજે મહત્વપૂર્ણ પગલું ભર્યું. Textile and Apparel Development Association (TAADA) દ્વારા iNDEXTb (ગુજરાત સરકાર)ના સહયોગથી *”National Textile Export Conclave 2026: Surat’s Export Roadmap“*નું સફળ આયોજન SGCCI પ્લેટિનમ હોલ, સરસાણા, સુરત ખાતે કરવામાં આવ્યું.
દેશના માનનીય પ્રધાનમંત્રી શ્રી નરેન્દ્ર મોદી દ્વારા નિર્ધારિત 100 બિલિયન અમેરિકન ડોલરના રાષ્ટ્રીય નિકાસ લક્ષ્યને સાકાર કરવામાં ગુજરાત અને ખાસ કરીને સુરતની ભૂમિકાને કેન્દ્રસ્થાને રાખીને યોજાયેલા આ કોન્ક્લેવમાં ટેક્સટાઇલ અને એપેરલ ઉદ્યોગ સાથે સંકળાયેલા ઉદ્યોગસાહસિકો, નિકાસકારો, ગાર્મેન્ટ ઉત્પાદકો, ફેબ્રિક વેપારીઓ, એમ્બ્રોઇડરી ઉદ્યોગના પ્રતિનિધિઓ, ડિઝાઇનર્સ, સ્ટાર્ટઅપ્સ, ઉદ્યોગ સંગઠનો તથા વિદ્યાર્થીઓએ ઉત્સાહપૂર્વક ભાગ લીધો.
કાર્યક્રમ દરમિયાન વક્તાઓએ સુરતને ભારતનું અગ્રણી નિકાસ કેન્દ્ર બનાવવા માટેની વ્યવહારુ વ્યૂહરચનાઓ પર વિસ્તૃત ચર્ચા કરી. નિષ્ણાતોએ વૈશ્વિક બજારની માંગ, પ્રોડક્ટ ડેવલપમેન્ટ, નવા નિકાસ અવસરો, આંતરરાષ્ટ્રીય બાયર્સ અને બાયિંગ હાઉસિસ સુધી પહોંચ, સરકારી યોજનાઓ, ગુણવત્તાના ધોરણો (Compliance), સર્ટિફિકેશન, ESG, નાણાકીય સુરક્ષા તેમજ બદલાતા વૈશ્વિક વેપાર પરિસ્થિતિમાં સ્પર્ધાત્મક રહેવા જેવા મહત્વપૂર્ણ વિષયો પર માર્ગદર્શન આપ્યું.
કોન્ક્લેવમાં દેશના પ્રતિષ્ઠિત નિષ્ણાતો અને સરકારી અધિકારીઓએ પોતાના વિચારો રજૂ કર્યા. શ્રી જિગર દવે, Joint Commissioner, Industries Department, Government of Gujarat તથા iNDEXTbએ *”Gujarat Industrial Policy & Gujarat Textile Policy 2024-2029″* વિષય પર પ્રસ્તુતિ આપતાં વર્ષ 2030 સુધી ભારતના નિકાસ લક્ષ્યને હાંસલ કરવામાં ગુજરાતની ભૂમિકા અને રાજ્ય સરકારની નીતિઓ પર પ્રકાશ પાડ્યો. શ્રી સત્યદેવ ડી., Foreign Trade Development Officer, DGFT Suratએ નિકાસ પ્રક્રિયા અને DGFTની સેવાઓ વિશે માહિતી આપી.
આ ઉપરાંત શ્રી પ્રશાંત અગ્રવાલ (Co-Founder, Wazir Advisors), શ્રી રાજીવ બંસલ (Vice President, Celestial Dreams), શ્રી અભિષેક અગ્રવાલ (CEO, Kay Tex Exporters), શ્રી શાયક ચટર્જી (Co-Founder, Breathe ESG), શ્રી સૌરભ જૈન (Branch Manager, ECGC Surat) તથા શ્રી જય પ્રકાશ ગોયલ (Gujarat Head, FIEO)એ પોતાના અનુભવો શેર કરતાં ઉદ્યોગને વૈશ્વિક બજારમાં વધુ સ્પર્ધાત્મક બનાવવા, નિકાસમાં વધારો કરવા તથા નવા અવસરોનો લાભ લેવા માટે મહત્વપૂર્ણ માર્ગદર્શન પૂરું પાડ્યું.
TAADAના અધ્યક્ષ ડૉ. અજય ભટ્ટાચાર્યએ પોતાના સંબોધનમાં જણાવ્યું કે આજે સુરત MMF (Man-Made Fibre), વિસ્કોઝ, એમ્બ્રોઇડરી, ડેનિમ, ગાર્મેન્ટિંગ અને ટેક્નિકલ ટેક્સટાઇલ જેવા ક્ષેત્રોમાં દેશનું અગ્રણી ઉત્પાદન કેન્દ્ર બની ગયું છે. તેમણે જણાવ્યું કે ઉદ્યોગ, નિકાસકારો, સરકાર અને સંબંધિત સંસ્થાઓના સંયુક્ત પ્રયાસોથી જો નિકાસકેન્દ્રિત વ્યૂહરચના અપનાવવામાં આવે તો સુરત વર્ષ 2030 સુધી ભારતના 100 બિલિયન અમેરિકન ડોલરના ટેક્સટાઇલ નિકાસના રાષ્ટ્રીય લક્ષ્યને હાંસલ કરવામાં સૌથી મોટું યોગદાન આપનાર શહેર બની શકે છે.
સાંજે 7:00 વાગ્યે Institute of Design & Technology (IDT) દ્વારા રજૂ કરાયેલા બહુપ્રતીક્ષિત ફેશન શો *”FASHIONOVA 2026″*નું ભવ્ય આયોજન કરવામાં આવ્યું, જેણે પોતાની સર્જનાત્મકતા, નવીનતા અને સસ્ટેનેબિલિટીની અનોખી રજૂઆત દ્વારા દર્શકોને મંત્રમુગ્ધ કરી દીધા. આ ફેશન પ્રસ્તુતિમાં IDTના સુરત, મુઝફ્ફરપુર, કોટ્ટાયમ અને જૂનાગઢ સહિત દેશભરના વિવિધ કેન્દ્રોમાંથી આવેલા આશરે 250 વિદ્યાર્થીઓએ ભાગ લીધો અને પોતાના દ્વારા ડિઝાઇન કરાયેલા વિશિષ્ટ કલેક્શનનું રેમ્પ પર આકર્ષક પ્રદર્શન કર્યું.
ફેશન શોમાં મહિલા, પુરુષ અને બાળકો માટેના ડિઝાઇનર વસ્ત્રોની મનમોહક શ્રેણીઓ રજૂ કરવામાં આવી. દેશમાં કિડ્સ ડિઝાઇનર વેરની વધતી માંગને ધ્યાનમાં રાખીને IDTએ આ વર્ષે ખાસ કરીને બાળકો માટે નવીન અને ટ્રેન્ડ આધારિત કલેક્શન રજૂ કર્યા, જેને દર્શકો તેમજ ઉદ્યોગના નિષ્ણાતો તરફથી ભારે પ્રશંસા મળી.
*FASHIONOVA 2026*નું સૌથી વિશેષ આકર્ષણ ફળોના કચરા (Fruit Waste)માંથી વિકસાવવામાં આવેલા સસ્ટેનેબલ ફેબ્રિકથી તૈયાર કરાયેલા વિશેષ પરિધાનો રહ્યા, જેઓએ પર્યાવરણ સંરક્ષણ, સર્ક્યુલર ફેશન અને ભવિષ્યની ગ્રીન ટેક્સટાઇલ ટેક્નોલોજીનો શક્તિશાળી સંદેશ આપ્યો. આ ઉપરાંત ભારતીય હસ્તકલા, આધુનિક ડિઝાઇન, ટેક્નોલોજીકલ નવીનતા અને સસ્ટેનેબલ ફેશન આધારિત 250થી વધુ ડિઝાઇનર પરિધાનોએ રેમ્પ પર ફેશન અને પર્યાવરણ વચ્ચેના સંતુલિત સમન્વયની પ્રેરણાદાયી ઝાંખી રજૂ કરી.
આ પ્રસંગે IDTના ડિરેક્ટર શ્રી અનુપમ ગોયલે જણાવ્યું કે, *”FASHIONOVA માત્ર એક ફેશન શો નથી, પરંતુ ભારતના ઉભરતા ડિઝાઇનરોને પોતાની પ્રતિભા વૈશ્વિક મંચ પર રજૂ કરવાની એક સશક્ત તક છે. IDTનું ધ્યેય એવા ડિઝાઇનરો તૈયાર કરવાનો છે, જે સર્જનાત્મકતા સાથે સસ્ટેનેબિલિટી, ટેક્નોલોજી અને ઉદ્યોગની બદલાતી જરૂરિયાતોને પોતાના ડિઝાઇનમાં સમાવી ભારતના ફેશન અને ટેક્સટાઇલ ઉદ્યોગને નવી દિશા આપે.