સુરતની Gen Z યુવતી હવે હેલસિંકીમાં ભણશે, સિબેલિયસ એકેડમીના ગ્લોબલ મ્યુઝિક માસ્ટર્સ પ્રોગ્રામમાં પસંદગી
સુરત. Gen Zની ઓળખ સામાન્ય રીતે સોશિયલ મીડિયા, ડિજિટલ દુનિયા અને નવી ટેક્નોલોજી સાથે જોડાય છે. પરંતુ સુરતની 22 વર્ષની વન્યા ભટ્ટે આ જ Gen Z માટે એક અલગ ઓળખ ઊભી કરી છે. વન્યાને ફિનલેન્ડની પ્રતિષ્ઠિત Sibelius Academyના Global Music Master’s Programmeમાં એડમિશન મળ્યું છે. આ એકેડમી વિશ્વની અગ્રણી સંગીત સંસ્થાઓમાં ગણાય છે.
QS World University Rankings by Subject 2025 મુજબ Sibelius Academyને Musicમાં વિશ્વમાં 9મું અને Performing Artsમાં 14મું સ્થાન મળ્યું છે. University of the Arts Helsinkiનો ભાગ એવી આ એકેડમીમાં વિશ્વભરમાંથી સંગીતના વિદ્યાર્થીઓ પ્રવેશ મેળવવા માટે પ્રયાસ કરે છે અને પસંદગીની પ્રક્રિયા અત્યંત સ્પર્ધાત્મક માનવામાં આવે છે.
સુરતથી ફિનલેન્ડ સુધીની સફર
હીરા અને ટેક્સટાઇલ ઉદ્યોગ માટે વિશ્વભરમાં ઓળખાતા સુરતમાંથી સંગીતના ક્ષેત્રમાં આંતરરાષ્ટ્રીય સ્તરની આ સિદ્ધિ ખાસ બની જાય છે. વન્યાએ બાળપણમાં ભારતીય શાસ્ત્રીય સંગીતની તાલીમ લીધી હતી. જોકે, એક સમયે તેની સામે પણ સવાલ હતો—સંગીતને માત્ર શોખ રાખવું કે તેને જ કારકિર્દી બનાવવી?
આ સવાલનો જવાબ શોધવા માટે તેણે બેંગલુરુની *CHRIST (Deemed to be University)*માંથી Western Classical Vocal Musicમાં બેચલર ડિગ્રી મેળવી.
અભ્યાસ દરમિયાન તેને જાણીતા મ્યુઝિકલ My Fair Ladyમાં મુખ્ય પાત્ર Eliza Doolittleની ભૂમિકા ભજવવાની તક મળી. માર્ચ 2025માં થયેલા આ પ્રોડક્શનને દર્શકો તરફથી સ્ટેન્ડિંગ ઓવેશન મળ્યું. આ અનુભવ બાદ સંગીતને સંપૂર્ણ સમયની કારકિર્દી બનાવવાનો તેનો આત્મવિશ્વાસ વધુ મજબૂત થયો.
હવે ભારતીય મૂળ સાથે ગ્લોબલ મ્યુઝિકનું સપનું
ગ્રેજ્યુએશન બાદ વન્યાએ ફિનલેન્ડની Sibelius Academy માટે ઓડિશન આપ્યું અને Global Music Master’s Programmeમાં તેની પસંદગી થઈ.
વન્યાનું લક્ષ્ય હવે ભારતીય શાસ્ત્રીય સંગીતના પાયાને Western Classical અને વિવિધ દેશોની સંગીત પરંપરાઓ સાથે જોડીને એવું ઓરિજિનલ મ્યુઝિક તૈયાર કરવાનું છે, જેમાં ભારતીય મૂળ પણ હોય અને વૈશ્વિક શ્રોતાઓ સાથે કનેક્ટ થવાની ક્ષમતા પણ હોય.
‘હજારો વિદ્યાર્થીઓને વિદેશ મોકલ્યા, પણ આવું પ્રથમ વખત જોયું’
દક્ષિણ-પૂર્વ એશિયાના અગ્રણી વિદ્યાર્થી ઇમિગ્રેશન કન્સલ્ટન્ટ અને હજારો વિદ્યાર્થીઓને વિદેશમાં અભ્યાસ માટે માર્ગદર્શન આપનાર રાજીવ સોનીએ વન્યાની પસંદગીને અસામાન્ય સિદ્ધિ ગણાવી.
તેમણે કહ્યું, “ફિનલેન્ડ સહિત વિવિધ દેશોમાં વિદ્યાર્થીઓને માર્ગદર્શન આપવાની મારી સમગ્ર કારકિર્દીમાં પહેલીવાર મેં કોઈ ગુજરાતી યુવતીને Sibelius Academyમાં એડમિશન મેળવતા જોઈ છે. આ ખરેખર નોંધપાત્ર સિદ્ધિ છે.”
સોનીના જણાવ્યા અનુસાર, છેલ્લા એક દાયકામાં ગુજરાતમાંથી ફિનલેન્ડ જતાં વિદ્યાર્થીઓની સંખ્યા વધી છે. એન્જિનિયરિંગ, IT, બિઝનેસ અને હેલ્થકેર જેવા ક્ષેત્રોમાં વિદ્યાર્થીઓ વધુ જોવા મળે છે. જોકે, સંગીત જેવી વિશિષ્ટ શાખામાં વિશ્વસ્તરીય એકેડમીમાં પ્રવેશ મેળવવો હજુ પણ દુર્લભ છે.
Gen Z માટે પણ એક અલગ મેસેજ
વન્યાની સફર માત્ર એક વિદ્યાર્થીના વિદેશ જવાના સમાચાર નથી. તે એ વાતનો સંકેત પણ છે કે આજની Gen Z પરંપરાગત કરિયર વિકલ્પોથી આગળ વિચારી રહી છે. મેડિકલ, એન્જિનિયરિંગ અને મેનેજમેન્ટ ઉપરાંત સંગીત, પરફોર્મિંગ આર્ટ્સ અને અન્ય વિશિષ્ટ ક્ષેત્રોમાં પણ ભારતીય યુવાનો વૈશ્વિક સ્તરે પોતાની જગ્યા બનાવી રહ્યા છે.
વન્યા હવે હેલસિંકીમાં અભ્યાસ શરૂ કરશે. ત્યાં તે વિવિધ સંસ્કૃતિઓની સંગીત પરંપરાઓનો અભ્યાસ કરવાની સાથે ભારતની સંગીત પરંપરામાંથી પ્રેરણા લઈને પોતાની ઓરિજિનલ મ્યુઝિક તૈયાર કરવા પર ધ્યાન કેન્દ્રિત કરશે.